En FARO Facility Services desfrutamos dunha xornada moi especial no Club de Golf Val de Rois, un lugar que coñecemos ben porque somos a empresa responsable da limpeza das súas instalacións. Desta volta puidemos vivir o club como participantes.
Para a maioría do equipo era a primeira vez xogando ao golf, e a experiencia foi tan formativa como divertida. Aprendemos golpes de precisión en distancias curtas, traballando a técnica do putt con dinámicas como o tres en raia ou o reloxo. Tamén practicamos exercicios para controlar o ángulo do pau e o bote da bóla, e realizamos golpes longos con simulador, medindo distancia, velocidade e traxectoria.
Aprofundamos nos tipos de paus, a postura segundo o golpe e a colocación das mans, un detalle técnico clave para a precisión.
Finalizamos cun dos momentos máis divertidos cunha pequena competición entre os adestradores, Mencía, Jacobo e Adrián, que nos amosaron técnica, control e estilos moi diferentes. Queremos destacar o trato excelente recibido e a profesionalidade de todo o equipo, que nos guiou con paciencia, humor e dedicación.
Pechamos a xornada cun aperitivo e un xantar estupendo, nun ambiente relaxado que reforzou a conexión do grupo.
Foi unha xornada para aprender, desconectar e seguir medrando como equipo. Grazas ao Club de Golf Val de Rois pola confianza e por abrirnos as súas portas tamén desde este lado.
Animamos, a calquera que teña curiosidade por este deporte, a achegarse e probar a experiencia. Na web do Club de Golf Val de Rois está toda a información necesaria para iniciarse ou seguir mellorando.
